’உப்பில்லாப் பண்டம் குப்பையிலே’ என்பது வழக்கு. உப்பில்லா சாப்பாட்டை நம்மால் ஒரு கவளம் கூட எடுத்து வாயில் வைக்க முடியாது. ஆனால் மனதிற்கு பிடித்த பெண்ணை மணப்பதற்காக உப்பில்லாமல் சாப்பிட சம்மதித்துப் பல யுகங்களாக உப்பில்லாமலேயே சாப்பிட்டு வரும் திருவிண்ணகரப்பன் என்னும் ஒப்பிலியப்பன் எழுந்தருளியிருக்கும் ஒப்பிலியப்பன் கோயிலுக்கு பிரவேசித்து அவரின் சிறப்பம்சங்களையும் தெரிந்துக்கொள்வோம்.
ஒப்பிலியப்பன் கோயில் கும்பகோணம் திருநாகேஸ்வரம் அருகே அமைந்துள்ள ஒரு திருத்தலம். இது 108 திவ்ய தேசங்களில் ஒன்று என்பது மட்டுமின்றி தாயார் அவதரித்தத் தலம் என்ற பெருமையும் இதற்கு உண்டு. பேயாழ்வார், திருமங்கையாழ்வார், நம்மாழ்வார் ஆகியோரால் மங்களாசாசனம் பெற்ற கோயில்.
ஸ்தல வரலாறு: ஒருமுறை பூமா தேவி மகாவிஷ்ணுவிடம் அவர் எப்பொழுதும் மகாலட்சுமியையே தன் மார்பில் தாங்கிக் கொண்டிருக்கிறார், தனக்கு அந்த பாக்கியம் கிடைக்காதா என்று ஏக்கத்துடன் கேட்டார். அதற்கு மகாவிஷ்ணு, பூமாதேவி விரைவில் பூலோகத்தில் ஒரு மகரிஷிக்கு மகளாக துளசி என்றப் பெயருடன் பிறந்து வளர்ந்து தன்னை வந்தடைவார் என்று கூறினார். அதே சமயம் பூலோகத்தில் மார்கண்டேயர் என்னும் முனிவர் மகாலட்சுமியே தன் மகளாகப் பிறக்க வேண்டும் என வேண்டி தவமிருந்தார்.
லட்சுமியின் அம்சமான பூமாதேவி சிறு குழந்தையாய் துளசிச் செடியின் அருகே கிடப்பதைக் கண்டார் என்றும் பதினாறு வயதுடைய மார்கண்டேய மகரிஷி. அக்குழந்தை மகாலட்சுமியின் அம்சம் என்பதை தன் ஞான திருஷ்டி மூலம் அறிந்து அதற்கு துளசி எனப் பெயரிட்டு எடுத்து வளர்க்கலானார். துளசிக்கு திருமண வயது வந்ததும் ஒருநாள் மகாவிஷ்ணு முதியவர் வேடம் தரித்து வந்து பெண் கேட்டார். அதற்கு மார்கண்டேயர், ‘ எனது மகள் சிறு குழந்தை. அவளுக்கு இன்னும் சாப்பாட்டில் சரியாக உப்பு போட்டுக்கூட சமைக்கத் தெரியாது’ என்று மறுத்தார். வந்தவர் திருமால் ஆயிற்றே! சும்மா விடுவாரா? ‘ அதனாலென்ன பரவாயில்லை, உப்பில்லாத சாப்பாடே சாப்பிட்டுக் கொள்கிறேன்’ என வற்புறுத்தினார். வந்திருப்பவர் திருமால்தான் என்பதையும் தன் ஞான திருஷ்ட்டியில் அறிந்த மார்கண்டேயர் திருமணத்திற்கு சம்மதித்தார். துளசிதேவி துளசி மாலையாக மாறி திருமாலின் மார்பில் நிரந்தர இடம்பிடித்தாள். உப்பில்லாமல் சாப்பிட சம்மதித்ததால் உப்பிலியப்பன் என்றும் ஒப்பில்லாத பெருமையுடையவர் என்பதால் ஒப்பிலியப்பன் என்றும் அழைக்கப்படுகிறார். இத்தலத்தில் எப்பொழுதும் உப்பில்லாத நைவேத்தியம் படைக்கப்படுகிறது. உப்புள்ள பண்டங்களை கோயிலுக்குள் எடுத்துச் செல்வதே தவறு என்றும் நம்பப்படுகிறது.
ஸ்தல விசேஷம்: பொதுவாக எப்பொழுதும் பூமாதேவி பெருமாளுக்கு இடப்புறமிருப்பாள். ஆனால் இது அவர்களுக்கு திருமணம் நடந்த ஸ்தலமாகையால் வலப்புறம் எழுந்தருளியிருக்கிறார்.
இத்தலத்தில் திருமால் பாதம் நோக்கி காட்டும் வலக்கரத்தில் கீதை உபதேசமான, "மாம் ஏகம் சரணம் விரஜ' என்று எழுதப்பட்டுள்ளது. இதற்கு "என்னை சரணடைபவர்களை காப்பேன்' என்று பொருள்.
மார்கண்டேயர் தன் மகளை திருமாலுக்கு மணம்முடித்துக் கொடுத்தப்போது எப்பொழுதும் தன் மகளை விட்டுப் பிரியக்கூடாது என்று கட்டளையிட்டார். அதனால் இங்கு திருமால் தாயாருடன் இணைந்தே பவனி வருகிறார்.
"பகலிராப்பொய்கை என்றழைக்கப்படும் இத்தலத்திலுள்ள அஹோத்ர புஷ்கரணி மிகவும் விசேஷமானது. இந்த குளத்தில் இரவு, பகல் எந்நேரமும் நீராடலாம் என்பது சிறப்பம்சம்.
உப்பில்லாத நைவேத்தியம் படைக்கப்படும் பெருமாளுக்கு திருப்பதி வெங்கடாசலபதிக்கு உள்ளது போல் தனி சுப்ரபாதம் உண்டு.
மேலும் இது என்றும் பதினாறு வயதே ஆகும் மார்கண்டேயர் வழிப்பட்ட தலம் என்பதால் இங்கு வழிப்பட்டால் ஆயுள் விருக்தியாகும் என்றும் நம்பப்படுகிறது.
கோயில் வரலாறு மற்றும் அமைப்பு: இங்குள்ள கல்வெட்டுகள் இக்கோயில் ராஜேந்திர சோழனின் காலத்தில் கட்டப்பட்டது என்று கூறுகின்றது.
இக்கோயிலில் 5 அடுக்குகள் கொண்ட 50 அடி உயர கோபுரம் கம்பீரமாக வரவேற்கிறது. இந்த கிழக்கு நோக்கிய கோயிலில் இரண்டு பிரகாரங்கள் உள்ளன.
பூஜை மற்றும் உற்சவங்கள்: பெருமாள் மார்கண்டேயரிடம் பெண் கேட்டு வந்தது பங்குனி மாதம் திருவோண நட்சத்திரத்தன்று. திருமணம் நடந்தது ஐப்பசி மாத திருவோண நட்சத்திரத்தன்று. அதனால் இக்கோயிலில் ஒவ்வொரு மாத திருவோண நட்சத்திரத்தன்று பெருமாள் சன்னதியில் அகண்ட விளக்கும், வால் தீபமும் ஏற்றி சாம்பிராணி தூபம் காட்டப்படுகிறது. அந்த விளக்கில் மகாலட்சுமி எழுந்தருளுவதாக ஐதீகம். இந்த தீபத்தை தரிசித்தால் செல்வம் பெருகும் என்று நம்பிக்கை.
இக்கோயில் தினமும் காலை 6 மணியிலிருந்து 1 மணி வரையிலும், மாலை 4 மணி முதல் இரவு 9 மணி வரையிலும் திறந்திருக்கும். ஆறு கால பூஜைகளும் முறைப்படி நடைப்பெறுகிறது. அதிகாலையில் விஸ்வரூப தரிசனத்துடன் நடைத் திறந்து ஆறு காலப் பூஜைகளும் நடைப்பெற்று இரவு நடைசாத்தப்படுகிறது.
திருப்பதியைப் போலவே இத்தலத்திலும் புரட்டாசி மாதம் பிரம்மோற்சவம் நடைப்பெறுகிறது. மேலும் திருமால் பெண் கேட்டு வந்த பங்குனி மாதத்திலும் பிரம்மோற்சவம் நடைப்பெறுகிறது. திருமணம் நடந்த ஐப்பசி மாதத்தில் 12 நாட்கள் வெகு விமரிசையாக கல்யாண உற்சவம் நடைப்பெறுகிறது.
எங்கே இருக்கிறது, எப்படி செல்வது? ஒப்பிலியப்பன் கோயில் கும்பகோணத்திலிருந்து 7 கிமி தொலைவில் உள்ளது. கும்பகோணத்திலிருந்து ஏராளமான பேருந்துகள், ஆட்டோக்கள், தனியார் வாகனங்கள் இருக்கிறது. ஒப்பிலியப்பன் கோயிலிலேயே தங்கும் வசதிகள் இருந்தாலும் கும்பகோணத்தில் தங்கியிருந்தும் வந்து சாமி தரிசிக்கலாம்.
எல்லா மனிதனும் பாராபட்சமின்றி ஆசைப்படும் செல்வ செழிப்பு, நீண்ட ஆயுள் அனைத்தும் வழங்கும் ஒப்பிலியப்பன் கோயிலுக்கு நாமும் ஒருமுறை சென்று தரிசித்து வருவோமே!
எல்லோரா விஜயா
No comments:
Post a Comment